لو ضويت الشمع ما تلعن ظلامك

لو
لو ضويت الشمع ما تلعن ظلامك
ما تلوم الليل لو يهجرك باكر
مرت الأيام في صحوة منامك
تعزف الماضي على نغمات حاضر
لو ذكرت الحرف ما تنسى كلامك
ما تقول الوقت لو ينكرك ناكر
ولو سألت الكون عن غيمة غرامك
امطرت دنياك خفقات وخواطر
لا تروح بعيد والواقع أمامك
لو لمست القلب صافحت المشاعر
يا عيون رمشها يخفي ألامك
الحزن ينطق مثل نطق المحاجر
لو تلاشى النور في ليلة حطامك
ما يمل الليل من سهر النواظر

........................................................................


هدي سنينك
هدي سنينك أكثر العمر قد راح
ياما خذا مني سنيني عجاله
باقي سنه والكل منا بيرتاح
باقي سنه ونروح كلٍ لحاله
يا ما تحملنا من احزان وافراح
وياما مشينا الدرب صعب وسهاله
يا ما خفينا من عظيمات الجراح
نضحك مثل منهو زمانه صفى له
لا تسأليني واكثر الدمع فضاح
لا تسأليني عنه ليه انهماله
تحملني يوم مني العزم طاح
تدرين هم الجرح صعب احتماله
باقي سنه الهم عنا بينزاح
ويغيب صوتي والقلم وانفعاله